Kupa e Italisë nuk është diçka e panjohur as për Interin dhe as për Simone Inzagin, që duke llogaritur edhe Lacion, e ka ngritur trofeun tri herë. Nëntë, në fakt, janë kupat e fituara nga zikaltrit, që për momentin janë vetëm një hap larg “yllit të argjendtë”.
Në rast se skuadra zikaltër do të triumfojë në këtë edicion, ka të drejtë që të bëjë një kërkesë në federatë që në fanellën për sezonin e ri të ketë një yll, i cili lidhet me fitoren e 10 Kupave të Italisë. Në fakt, nuk ekziston asnjë rregull për fitoren e 10 trofeve, sepse Juventusi ka 15 dhe nuk e ka bërë këtë kërkesë. Përballë Interit është Milani, që në këtë sezon është shndërruar në një mace të zezë. Kuqezinjtë kanë fituar 2 ndeshje në këtë sezon dhe një tjetër ka përfunduar në barazim në minutat shtesë.
– Milani dhe Interi janë përballur tashmë në këtë kompeticion, me një rekord që e sheh Milanin pak përpara me 10 fitore nga 27 ndeshje gjithsej, kundrejt 9 triumfeve të Interit dhe 8 barazimeve. Precedentët sugjerojnë beteja të balancuara, ku dallimet kanë qenë shpesh minimale.
– Milani ka fituar dy nga tri derbet e fundit kundër Interit në të gjitha turnetë, po aq fitore sa në 13 duelet e mëparshme (B2 H9) –
– Historikisht, të dyja skuadrat milaneze janë të rregullta në gjysmëfinale: Interi me 30 paraqitje, Milani me 25, pas vetëm Juventusit (36).
– “Djalli” është i pamposhtur në tri ndeshje kundër kushërinjve të tyre, por Interi ka shënuar në 11 derbet e fundit radhazi – një seri që vetëm zikaltrit kanë arritur ta ndërtojnë dy herë në historinë e tyre (1954-1959 dhe 1993- 1997).
– Milani është eliminuar në tri gjysmëfinalet e fundit, ndërsa Interi ka avancuar në dy më të fundit. Në këtë edicion, zikaltrit fituan dy herë 2- 0 pa pësuar gol, diçka që nuk kishte ndodhur që nga drejtimi i Murinjos në vitin 2010. Kuqezinjtë, nga ana tjetër e kanë kthyer në shfaqje: 9 gola në dy ndeshje (mesatarja 4.5), duke shënuar dhe pësuar në të gjitha ndeshjet.
– Tizhani Reijnders ka qenë tashmë protagonist në derbi me një asist dhe një gol këtë sezon, ndërsa Lautaro Martinez e ka ndëshkuar 9 herë Milanin. Kapiteni interist është një hap larg rekordmenëve Meaca (12) dhe Niers (11). Në Kupën e Italisë, argjentinasi është me tetë gola, ashtu si Hulio Kruz, bomberi më i mirë zikaltër në 20 sezonet e fundit.
– Mes trajnerëve që kanë luajtur më shumë sesa pesë derbe milanezë në të gjitha turnetë, vetëm Arpad Vaiz (67%, 8/12) krenohet me një shkallë më të lartë suksesi se Simone Inzagi (64%, 7/13). Për më tepër, në rast fitoreje, trajneri aktual i Interit do t’i bashkohej Helenio Herrerës dhe vetë Vaizit në vendin e 2- të ndër trajnerët më të suksesshëm në historinë e derbit milanez me tetë fitore në të gjitha turnetë, pas vetëm Karlo Ançelotit (10).
– Serxho Konseisao (i cili si lojtar bëri 41 paraqitje në Serinë A me Interin, midis 2001 dhe 2003) mund të bëhet trajneri i dytë i Milanit në 35 vitet e fundit që nuk humbet derbet e para të Milanos kundër kushërinjve, duke marrë parasysh të gjitha turnetë, pas Masimiliano Alegrit midis 2010 dhe 2011.
REINOLD BAKALLI-PANORAMASPORT.AL
