Ralf Rangnik është kthyer brenda pak kohësh në një emër shumë të lakuar në arenën ndërkombëtare. Trajneri ishte zhdukur nga radarët për një periudhë kohe, pasi Milani i prishi parakontratën që kishte lidhur me të, për t’i besuar ekipin Stefano Piolit.
Tekniku më pas kishte një periudhë të dështuar te Mançester Junajtid e në fund mori drejtimin e përfaqësueses së Austrisë. Pasi e kualifikoi atë në Euro 2024, është kthyer në kandidatin kryesor për të marrë drejtimin e Bajern Mynih, pas largimit të Tomas Tuhel në verë.
Bisedat me bavarezët i ka konfirmuar edhe vetë trajneri, i cili në fakt ka një marrëveshje deri në vitin 2026 me Federatën Austriake. “Bajern Mynih më kontaktoi dhe unë gjithashtu informova Federatën. Kemi një marrdhënie mirëbesimi.
Fokusi im aktualisht është të ekipi kombëtar i Austrisë. Jemi tërësisht të fokusuar te Kampionati Europian. Unë jam shumë komod këtu. Për momentin nuk ka asnjë arsye për t’u marrë me këtë çështje në mënyrë specifike dhe intensive.
Kur do ta marr në konsideratë? Në momentin kur Bajerni të thotë: Unë të dua. Dhe atëherë do të pyes veten: A e dua unë këtë? Nëse do të dëshiroj të bëj diçka ndryshe, fillimisht do ta diskutoj me Federatën”, tha Rangnik.
PANORAMASPORT.AL
