Cristiano Ronaldo, Lionel Messi, Neymar Junior… janë sërish ata, të cilët kanë dominuar në dy dekadat e fundit, lojtarët me të ardhurat më të mëdha për vitin 2024.
Sajti i specializuar për transferimin e lojtarëve, Transfermarkt, ka bërë një renditje të ‘yjeve’ të futbollit që fitojnë më shumë para nga kontratat e tyre dhe në krye, me diferencë të ndjeshme me njëri tjetrin dhe të tjerët janë CR7 dhe Messi.
Sipas Transfermarkt, portugezi i Al Nassr në Arabinë Saudite gjatë vitit 2024 arkëton në total mes pagës dhe kontratave me kompanitë e mëdha 263 milionë euro.
Messi, që luan tek Inter Miami në MLS i shton llogarisë së tij më pak se gjysmën e shumës që përfiton Ronaldo: 124 milionë euro.
Neymar Junior, edhe pse nuk luan prej një viti për shkak të një dëmtimi të rëndë, që e detyroi t’i nënshtrohet operacionit në gju, fiton 101 milionë.
I katërti vjen Benzema, që luan në të njëjtin kampionat me Ronaldon (Arabi Saudite), pastaj është radha e ‘yjeve’ të futbollit që luajnë në kampionatet elitare evropiane: Mbappe, Haaland, Vinicius Junior dhe Salah.