Një moment dramatik u regjistrua gjatë Sprint-it të Çmimit të Madh të Sao Paulos, ku piloti debutues brazilian, Gabriel Bortoleto, u përfshi në një aksident të rëndë që tronditi pistën. Fatmirësisht, 21-vjeçari doli pa asnjë lëndim nga incidenti, pavarësisht pamjeve të forta të përplasjes.
Gjithçka ndodhi në hyrje të kthesës së parë, kur piloti i skuadrës Kick Sauber humbi kontrollin e makinës. Ai goditi fillimisht murin e brendshëm, përpara se makina të shpërbëhej dhe të përplasej me barrierat e jashtme të pistës. Copëza karboni dhe metali u shpërndanë në të gjithë shtegun e garës, ndërsa vetura u shkatërrua thuajse tërësisht.
Pas incidentit, Bortoleto doli vetë nga makina dhe u kontrollua menjëherë nga stafi mjekësor, duke konfirmuar se ishte në gjendje të mirë shëndetësore.
“Jam mirë,” u shpreh ai më pas.
“Jam i zhgënjyer që nuk arrita të vazhdoj garën time të parë në shtëpi. Kisha besim te makina këtë fundjavë dhe prisja shumë. Tani dua vetëm të rikthehem në timon dhe të jap maksimumin.”
Megjithë përpjekjet e mekanikëve për të rikuperuar mjetin, dëmtimet rezultuan tepër serioze dhe Bortoleto nuk do të marrë pjesë në sesionet kualifikuese, duke u detyruar të nisë garën e së dielës nga fundi i renditjes.
Ky nuk ishte i vetmi incident në Sprint. Në të njëjtën kthesë humbën kontrollin edhe Oscar Piastri, Nico Hulkenberg dhe Franco Colapinto, duke përfunduar jashtë garës.
