Monza prezantoi para mediave trajnerit e sezonit të ri, post që do të mbahet nga Alessandro Nesta.
Ish-mbrojtësi i famshëm do të drejtojë për herë të parë një skuadër në Serie A, duke qenë se eksperiencat e mëparshme kanë qenë në kategoritë inferiore me Perugian, Frosinone dhe Reggiana.
Në konferencën për shtyp, 48-vjeçari u shpreh se prej lidhjes së të kaluarës te Milani me Gallianin dhe Berlusconin, ndjen te Monza një përgjegjësi të dyfishtë.
“Kjo eksperiencë për mua ka një domethënie të veçantë, pasi është e para në Serie A.
Kam punuar shumë për të mbërritur në këtë nivel dhe shpresoj të jem i përgatitur aq sa duhet. Së bashku me stafin tim kam studiuar shumë.
Puna me Gallianin është kënaqësi, por edhe përgjegjësi. Këtu te Monza ndihet edhe “dora” e Berlusconit, ai kudo ka shkelur ka lënë gjurmë. Kam gjetur kushte shumë të mira sa i takon infrastrukturës, edhe stadiumi ka ndryshuar”, u shpreh Nesta.
