Monza rinis nga Alessandro Nesta. Adriano Galliani e theu ngërçin dhe zgjodhi ish-mbrojtësin e Milanit si zëvendësues të Raffaele Palladino, i cili i është bashkuar Fiorentinës. Nesta, i cili sezonin e kaluar e udhëhoqi Reggianën drejt një mbijetese të lehtë në Serinë B, do të nënshkruajë kontratë deri më 30 qershor 2025 me opsion edhe për një vit tjetër në rast mbijetese. Për të kjo do të jetë eksperienca e parë në një stol të Serisë A.
Nesta do të gjejë një pjesë të Milanit ‘të tij’ në Monza, përkatësisht Adriano Galliani dhe Paolo Berlusconi. Në moshën 48-vjeçare dhe pas një praktike të gjatë (Inter Miami, Perugia, Frosinone dhe Reggiana), ish-mbrojtësi që shkroi historinë e Milanit është gati të luajë shansin e tij të madh në Serie A.
Për të garantuar për të është CEO Galliani, dikush që rrallëherë gabon kur bëhet fjalë për trajnerët dhe i pari që besoi te Palladino. Detyra e Nestas nuk do të jetë e lehtë, nisur nga puna e shkëlqyer e kolegut të tij në dy sezonet e fundit.
