12 barazime në 19 ndeshje kampionati, gjashtë në shtatë ndeshjet e fundit. Juventusi i Thiago Motta-s nuk po arrin të gjejë ritmin e duhur, edhe kundër Torinos u ndal në barazimin 1-1, i arritur nga një mjeshtëri e Vlasic:
“E nisëm shumë mirë dhe kaluam në avantazh,” komentoi trajneri i bardhezinjve pas ndeshjes, “më pas u tërhoqëm dhe pësuam një gol në një situatë ku mund të ishim më agresivë, një veprim individual. Në pjesën e dytë hymë mirë në lojë, luajtëm përpara dhe patëm raste që nuk i konkretizuam.
Kur tërhiqesh kështu, skuadrat kundërshtare fillojnë të hedhin topa në zonë dhe situatat bëhen të rrezikshme. Lojtari i Torinos, Vlasic, gjeti golin me një goditje që kalonte vetëm nga ai hapësirë. Në pjesën e dytë,” vazhdoi Motta, “patëm mundësitë për të fituar, por nuk ia dolëm. Doja një skuadër më agresive në pjesën e dytë, që të avanconte dhe të merrte kontrollin e fushës. Këtë e bëmë shumë më mirë.”
Lidhur me përjashtimin e tij për shkak të debatit me Vanoli-n, Motta ishte i prerë:
“Një vendim që nuk e meritoja. Fola me arbitrin edhe pas ndeshjes. Pas ndeshjes me Bolonjën thashë se meritoja përjashtimin sepse protestova. Respektoj vendimin e arbitrit, por sot për mua nuk ishte një përjashtim i drejtë. Gjithsesi, gjërat që ndodhin në fushë mbeten në fushë. Sot, nga këndvështrimi im, meritoja të vazhdoja të isha në stol.”
Kundër Torinos, Juventusi aktivizoi Douglas Luiz nga minuta e parë:
“Bëri një paraqitje të shkëlqyer dhe jam shumë i kënaqur sepse na duhen sa më shumë lojtarë në formë. Sa i përket Cambiaso-s, pas dëmtimit kundër Bolonjës ka pasur disa vështirësi për t’u kthyer me ekipin. E falënderoj sepse po luan me anti-inflamatorë për të ndihmuar skuadrën. Ka një shqetësim që e kufizon.”
