Duke parë listën e të dëmtuarve, është e qartë se situata më delikate tek Interi lidhet me mbrojtjen, me mungesat e Acerbi-t dhe Bisseck-ut, përveç Pavard-it, i cili sapo është rikuperuar dhe ende nuk është gati për të luajtur nga fillimi.
Por as mesfusha nuk është në gjendje më të mirë: shqetësimet e vogla të Çalhanoglu-së dhe Mkhitaryan-it për momentin nuk ngjallin alarm, por të dy do të mungojnë nesër kundër Venezias. Turku pritet të rikthehet kundër Bolognas-, ndërsa armenit, i cili vjen pas një lodhjeje muskulore, do t’i bëhet një rivlerësim pas fundjavës (për momentin nuk janë planifikuar analiza të mëtejshme).
Për më tepër, nuk duhet harruar situata e Frattesi-t, i cili, të paktën mendërisht, duket se ëndërron të jetë diku tjetër.
Në këto kushte, Inzaghi do të duhet të mbështetet në një mesfushë pothuajse tërësisht të re, ku Barella do të jetë ai që do të sigurojë stabilitet për Asllani-n dhe Zielinski-n. Nëse shqiptari mbetet më i vëzhguari nga tifozët, pasi paraqitja e dobët ndaj Milanit në Superkupë ka rihapur diskutimet për rritjen e tij të vërtetë si një zëvendësues i besueshëm i Çalhanoglu-së, polaku ka qenë më pak i kritikuar, por edhe prej tij priten përgjigje.
Deri më tani, Zielinski ka regjistruar njëzet paraqitje, por minutat totale (884′) tregojnë një mesatare prej gati një pjesë për ndeshje, duke sugjeruar se për Inzaghi-n mbetet një nga ata “bashkëtitullarët” e njohur. Megjithëse është e vështirë të preket mesfusha titullare, ish-lojtari i Napolit deri tani nuk ka treguar cilësinë që pritej prej tij. Zielinski ka teknikën dhe përvojën për t’u përshtatur plotësisht në mesfushën e Interit, por deri tani ka hasur vështirësi, si në rolin e regjisorit, siç u pa në barazimin 4-4 kundër Juventusit, ashtu edhe si mesfushor qendror, rol ku pritet të luajë kundër Venezias.
Taktikisht, ai është më i orientuar drejt lojës horizontale krahasuar me Mkhitaryan-in, ka më pak shpërthime, por ofron një menaxhim të topit të admirueshëm. Megjithatë, ekziston rreziku që të përplaset më shumë me regjisorin aktual, dhe kjo është një çështje që Inzaghi duhet ta adresojë. Nga ana tjetër, Zielinski, i lindur në vitin 1994, duhet të tregojë më shumë dinamizëm në një modul të ndryshëm nga 4-3-3 me të cilin ishte mësuar gjatë kohës te Napoli.
