Përzgjedhësi i Zvicrës, Murat Yakin, ka folur hapur për të ardhmen e Xherdan Shaqirit te Kombëtarja helvetike, duke pranuar se rikthimi i tij nuk është më pjesë e planeve.
Shaqiri, i cili shpalli pensionimin nga kombëtarja në korrik të vitit 2024, kishte ende një derë të hapur nga Yakin për t’u rikthyer. Megjithatë, në një intervistë për “bluewin”, trajneri la të kuptohet se tashmë kjo epokë i përket së shkuarës.
“Shaqiri ka dhënë jashtëzakonisht shumë për futbollin zviceran. Është një artist i vërtetë, një gjeni, një numër 10 me këmbë të majtë që Zvicra nuk e ka shpesh. Por koha ndryshon. Ai vetë ndoshta e ka kuptuar se nuk donte të kthehej si zëvendësues”, u shpreh Yakin.
Trajneri shtoi se është koha për të parë përpara: “Për mua ka kaluar një vit dhe gjithçka është mbyllur. Ne nuk e detyruam Shaqirin të largohej, ishte vendimi i tij personal dhe duhet respektuar. Tani kemi një brez të ri që po rritet dhe duhet të fokusohemi aty.”
Zvicra ndërkohë po ecën fuqishëm në kualifikueset e Kupës së Botës, ku pas fitoreve bindëse ndaj Kosovës (4-0) dhe Sllovenisë (3-0), shihet si favorite e qartë për të kaluar grupin si lidere.
