Portieri i përfaqësueses së Kosovës, Arijanet Muriç, ka lënë gjurmë në javën e gjashtë të Serie A, duke qenë një nga figurat kyçe në fitoren e ekipit të tij, Sassuolo, në transfertë ndaj Hellas Veronës.
Muriç ishte i pakalueshëm gjatë gjithë ndeshjes, duke bërë disa pritje vendimtare, të cilat e ndihmuan Sassuolon të ruajë rezultatin minimal 1-0.
Ai e mbajti portën e paprekur në një ndeshje ku skuadra vendase krijoi disa raste të rrezikshme, por u ndal në çdo rast nga ndërhyrjet e tij të sakta dhe të sigurta.
Falë paraqitjes së tij të jashtëzakonshme, gardiani kosovar u përfshi në formacionin e javës në Serie A, duke marrë vlerësime të larta nga mediat sportive në Itali dhe më gjerë.
Kjo është hera e parë që Muriç hyn në “11-shen” më të mirë të javës që nga ardhja e tij në kampionatin italian këtë sezon.
Pas huazimit nga Ipswich Town te Sassuolo, Muriç duket se po gjen formën ideale dhe po e shfrytëzon në maksimum mundësinë për të treguar potencialin e tij në një nga ligat më të forta të Europës.
Ky performim vjen në një moment të rëndësishëm për të, teksa edhe Kosova po përgatitet për ndeshjet e radhës në kuadër të Ligës së Kombeve.
