Fillimi i vështirë i kampionatit për Romën po shtyn Zhoze Murinjon që të mendojë të përmirësojë skuadrën jo vetëm në fushën e lojës, por edhe situatën e klubit jashtë saj. Mediat italiane bëjnë të ditur se në klub po mendohet një ide e bujshme e një kthimi të Françesko Totit te verdhekuqtë.
Sipas ”La Repubblica”, portugezi ka kërkuar afrimin e ish-kapitenit legjendar të Romës për të marrë rolin e figurës që do të përballet me situatat e pakëndshme që po krijohen herë pas here me gjyqtarët.
Do të jetë pikërisht Toti ai që do të ketë detyrën të shfaqet para mediave nëse do të jetë e nevojshme për të folur sidomos për çështjet që i përkasin gjykimit të ndeshjeve, kur ka “situata shqetësuese”. Murinjo e ka bërë vetë shpesh një gjë të tillë por gjithmonë rrezikon të përballet me pezullime dhe të mungojë në ndeshje.
Ndaj ka lindur kjo ide që do i pëlqente Totit, i cili u largua gjatë periudhës kur klubi ishte në pronësi të Xhejms Pallota, por ka tashmë marrëdhënie më të mira me pronarët e rinj, familjen Fridkin. Gjithsesi, ai ka lënë të kuptohet që do të pëlqente të kishte një rol edhe më thelbësor brenda strukturave të klubit, ndaj gjithçka është në fazën e bisedimeve.
PANORAMASPORT.AL