Duhet pranuar se ndeshjet e para të Kylian Mbappé me fanellën e Realit të Madridit nuk kanë qenë mbresëlënëse.
Sulmuesi francez, i cili nuk është thirrur nga Deschamps për ndeshjet e ardhshme të Ligës së Kombeve, ka bërë një paraqitje të dobët ndaj Barcelonës, Milanit dhe Osasunës në sfidat e fundit që kanë luajtur madrilenët.
Ai që ka komentuar momentin jo të mirë të futbollistit transalpin, është dikush që Realin e Madridit e njeh shumë mirë, mbrojtësi Nacho:
“Mbappé është një nga më të mirët në botë. Kur arrin në një klub si Real Madridi, është e vështirë të përshtatesh, kjo u ka ndodhur të gjithëve. Nuk është njësoj të luash te Reali i Madridit apo kudo tjetër. Kur të shpërthejë do të jetë spektakolar”.
