Legjenda e tenisit, Rafael Nadal, ka dhënë një mesazh të veçantë dhe motivues për yllin e ri të FC Barcelonës, Lamine Yamal.
Ai e ka këshilluar talentin spanjoll që të menaxhojë me maturi suksesin dhe presionin e madh që e shoqëron në moshë kaq të re.
Gjatë një interviste, Nadal tha se Yamal duhet të tregojë kujdes me njerëzit që e rrethojnë dhe të dëgjojë këshillat e atyre që duan t’i shohin përparimin.
“Lamine Yamal duhet të rrethojë veten vetëm me njerëz që vërtet i duan të mirën. Ai duhet të jetë mjaft i zgjuar për të dëgjuar gjëra që ndonjëherë nuk duam t’i dëgjojmë,” u shpreh Nadal.
Sipas tij, fama dhe suksesi në moshë të re mund të jenë të rrezikshëm nëse nuk menaxhohen siç duhet, sidomos për një sportist që është tashmë në qendër të vëmendjes botërore.
