Kvaratskhelia te PSG është tashmë një punë e kryer. Ylli gjeorgjian ka plotësuar dëshirën për ndërrimin e viteve duke lënë Napolin në këmbim të një eksperience të re, që do t’i garantojë miliona euro më shumë fitime.
Sulmuesi anësor, një nga më të mirët në botë në rolin e tij, i kishte shprehur zyrtarisht dëshirën klubit italian dhe trajnerit Conte për t’u larguar, duke qenë se kishte marrë një ofertë të parezistueshme nga skuadra franceze.
Ai ka firmosur për një pagë prej 8 milionë eurosh neto në sezon, e cila mund të arrijë deri në 10 milionë euro bashkë me bonuset, për një kontratë 5-vjeçare. Aktualisht, te Napoli, ai fitonte 1.8 milionë euro në vit, një shumë shumë më e ulët sesa lojtarët e tjerë të skuadrës. Edhe pse De Laurentiis kishte deklaruar se mund t’i ofronte deri në 6 milionë euro në vit, oferta e PSG-së ishte ndjeshëm më e lartë.
Pavarësisht humbjes së lojtarit të tyre më të mirë, Napoli mund të kënaqet të paktën me faktin se do të marrin 70 milionë euro menjëherë nga shitja e kartonit të Kvaratskhelias, plus 15 milionë euro të tjera në formë bonusesh.
23-vjeçari, i blerë në verën e vitit 2022, ka luajtur 85 ndeshje duke shënuar 28 gola, madje ishte protagonist kryesor i titullit kampion të vitit 2023 me Napolin në Serie A.
Tani, shqetësimi i madh për Napolin dhe veçanërisht për Conten, që lufton për titullin në Itali, është se si do ta zëvendësojnë gjeorgjianin. Për Garnachon, Manchester United kërkon shumë, plot 70 milionë euro. Ndërsa për Edon Zhegrovën, për të cilin është ndërmjetës Amir Rrahmani, Lille nuk dëshiron ta shesë.
Objektivi më i mundshëm është huazimi i Federico Chiesas nga Liverpool, ndërsa në orët e fundit kanë dalë edhe dy emra të tjerë: Karim Adeyemi i Borussia Dortmund dhe Timo Werner i Leipzig. /vizionplus.tv
