Anglia do të përfaqësohet me 6 skuadra në fazën e grupit të përbashkët në Champions League.
Tashmë kjo është zyrtare pasi britanikët kanë shfrytëzuar formulën e re në maksimum, për të maksimizuar numrin e ekipeve pjesëmarrëse në turneun më të rëndësishëm për klube në kontinent.
Normalisht, britanikët e nisnin sezonin aktual me sigurinë në bazë të koeficienteve për 4 skuadra pjesëmarrëse në edicionin e ardhshëm. Por falë paraqitjes së klubeve në Europë në këtë edicion, u bë një nga dy shtetet që siguroi edhe ekipin e pestë në Champions, përkrah Spanjës.
Ekipi i gjashtë i ka ardhur sot, kur në finalen e Ligës së Europës shkuan Mançester Junajtid dhe Totenhem. Të dy këto skuadra janë shumë larg zonës së Euroipës, pasi gjenden në pjesën e poshtme të klasifikimit në Premier Ligë.
Ndaj cilado që të fitojë këtë turne, do të ketë të garantuar një vend në Ligën e Kampioneve në edicionin e ardhshëm, pa ia rrëmbyer atë një tjetër klubi të Premier Ligës.
Kësisoj, 6 nga 36 skuadrat pjesëmarrëse në fazën e grupit në Ligën e Kampioneve në edicionin e ardhshëm do të jenë nga Anglia, diçka e paprecedent në historinë e turneut.
