Kampionati grek i futbollit po shkon drejt fundit të tij, me Olimpiakosin që ka siguruar prej kohësh titullin kampion, por me një luftë të ndezur për vendin e dytë që të siguron pjesëmarrjen në Ligën e Kampioneve.
Në vendin e dytë është Panathinaikos, i ndjekur nga PAOK dhe AEK i Athinës, të gjitha të përfshira në tre pikë diferecnë në renditje. Dhe pikërisht këtë javë luhet një sfidë shumë e zjarrtë mes AEK-ut dhe Panathinaikos, që mund të jetë vendimtare.
Për sfidat e javëve të fundit të grupit të titullit, Federata Greke ka menduar që të afrojë gjyqtarë të huaj për t’i drejtuar, për të shmangur problemet me tifozerinë vendase dhe akuzat e zakonshme për vendime të njëanshme. Për derbin e zjarrtë të kësaj fundjave mes AEK dhe Panathinaikos, është konfirmuar se do të jetë një treshe shqiptare ajo që të të drejtojë takimin. Enea Jorgji, bashkë me asistentët Denis Rexha dhe Ridiger Çokaj do të ndajnë drejtësinë në këtë sfidë të rëndësishme.
Panathinaikos gjendet në vendin e dytë me 56 pikë, ndërsa AEK në vendin e katërt me 53 pikë. AEK-u, pjesë e të cilës është edhe Thomas Strakosha, duhet të fitojë medoemos këtë ndeshje për të shpresuar në vendin e dytë, pasi çdo rezultat tjetër praktikisht i jep fund ëndrrave për Champions.
PANORAMASPORT.AL
