Sulmuesi brazilian Nejmar i ka kërkuar zyrtarisht PSG-së që ta lejojë të largohet gjatë merkatos së verës. Lajmi i bujshëm është publikuar sot nga “L’Equipe”, e cila ka zbuluar se braziliani nuk ka ndër mend të vazhdojë më karrierën në Francë, në një projekt i cili ka humbur shkëlqimin e tij.
Tashmë janë mediat angleze ato që kanë mësuar se cili është klubi që po mendon të afrojë sulmuesin brazilian gjatë merkatos. “The Sun” bën të ditur se është klub i Çelsit që po negocion me futbollistin, pasi ka si objektiv ta sjellë në Londër.
Blutë raportohet se ishin në pritje vetëm që lojtari të bënte kërkesën zyrtare për transferimin e tij, që të hyjë në skenë për bisedime me lojtarin, por dhe me PSG-në, që kërkon të rikuperojë një pjesë të rëndësishme të parave që shpenzoi për ta blerë nga Barcelona.
Informacionet e para bëjnë të ditur se parisienët kërkojnë rreth 70 milionë euro për kartonin e tij, por sidomos që të heqin qafë sa më parë një rrogë monstruoze që përfiton ai në klub, mbi 25 milionë euro.
PANORAMASPORT.AL
