Fransisko Konseisao është lojtari i fundit i dëmtuar te Juventusi që i shtohet listës së gjatë ku nuk mungojnë emra si Veiga, Duglas Luiz pa përfshirë këtu ata që kanë humbur sezonin tashmë.
Por kur do të rikthehen në dispozicion të Motës lojtarët që nuk e kanë humbur sezonin? Për portugezin, kjo është ndalesa e tretë që nga veshja e fanellës së Juventusit. Dëmtimi i parë ishte në fillim të shtatorit, në janar Motës iu desh të bënte pa Konseisaon për herë të dytë, ndërsa tani është hera e tretë.
Tani ndalesa vjen në një moment vendimtar për Juventusin, të cilit i kërkohet të tregojë me çdo kusht veten pas eliminimit të turpshëm nga Kupa e Italisë. Bardhezinjtë do të duhet të luajnë pa magjinë e portugezit, të paktën deri në fund të marsit, ku ai pritet të jetë i gatshëm për sfidën kundër Xhenoas më 29 mars. Megjitahtë, jo vetëm Konseisao pritet të kthehet në fund të marsit pasi edhe Renato Veiga është pranë rikuperimit dhe pritet të kthehet në të njëjtën kohë me Konseisaon.
Bashkë me dyshen e sipërpërmendur, pritet të rikthehet edhe Nikolo Savona që po mungon që nga sfida Kaljari-Juventus. Mota sakaq duhet të presë më gjatë për Arek Milik për të cilin nuk ka një datë fikse se kur do të rikthehet.
Bremer e Kabal më pas kanë humbur sezonin. Rikthimi i atyre pritet që të jetë në Botërorin e Klubeve. Megjithatë, situata e Juventusit aktualisht në kampionat është e favorshme pasi vjen pas 5 fitoreve radhazi dhe Mota ka vetëm një kërkesë sa i përket infermierisë. Ai dëshiron të kthehen sa më parë lojtarët që nuk e kanë humbur sezonin duke parë se Juventusi tashmë nuk po lufton vetëm për zonën Champions.
PANORAMASPORT.AL
