Dita e djeshme ka qenë speciale për botën e Interit, sepse një nga legjendat e këtij klubi, ai që dha shpirtin, pasionin dhe pasurinë e tij për ta ringritur dhe për të “pushtuar” Europën, Masimo Morati, festonte 80-vjetorin e tij dhe në rrjetet sociale nuk kanë munguar urimet për të.
Shumë ishlojtarë dhe trajnerë që e kanë konsideruar atë si një baba, e kanë uruar me postime dhe kujtime të bukura. Nuk mungonte as Zhoze Murinjo. “Presidentit tim. I uroj shumë lumturi në këtë ditëlindje”, shkroi trajneri portugez në “Instagram”, duke postuar një nga fotot e festës së finales në Madrid. Edhe Stiven Zhang shkroi:
“Për presidentin që na bëri të gjithë të dashurojmë ngjyrat zikaltër. Urime!”. Samuel Eto e quan baba: “Gëzuar ditëlindjen babai president Masimo Morati”. Nuk munguan gjithashtu urimet nga skuadra e Interit në profilet zyrtare, por edhe nga Havier Zaneti, Marko Materaci dhe shumë të tjerë, që kanë qenë në kohën e tij futbollistë dhe trajnerë të Interit.
PANORAMASPORT.AL
