Kjo duket një verë e mallkuar për Interin, për të gjetur një sulmues. Pas ndërprerjes së bisedimeve me Romelu Lukakun, pas tradhtisë së tij me Juventusin, në Milano u duk se kishin gjetur akordin me sulmuesin që i mungonte dhe në të njëjtën kohë mund t’i ishin përgjigjur Juves me të njëjtën monedhë, duke u afruar shumë me Alvaro Moratën.
Por pasi menaxherët e spanjollit u takuan dhe gjetën akordin financiar, gjithçka u mbyll shumë shpejt, pasi administratori Xhuzepe Marota nuk ka ndërmend që të shkojë më lart sesa 15 milionë euro, ndërkohë që kërkesa minimale e Atletikos së Madridit, e cila ka në pronësi kartonin e Moratës është 21 milionë.
Gjithsesi, nga dje, edhe sikur tek Interi dikush të ndërronte mendje vjen lajmi se Alvaro është ndjerë i mërzitur nga ky mosbesim i shfaqur nga zikaltrit dhe ka lajmëruar nëpërmjet menaxherëve të tij se tratativa me zikaltrit mund të quhet e mbyllur.
Nëse do të ketë një mundësi për Moratën për t’u kthyer në Serinë A, atëherë dy pistat e vetme janë Juventusi dhe Roma, e cila ka kohë që falë Zhoze Murinjos këmbëngul për të pasur në skuadër 30-vjeçarin dhe për t’i dhënë atij një fanellë titullari në vijën e parë të sulmit, ku gjiganti Tami Abraham nuk do të mund të luajë, pas operimit, deri në janar 2024.
PANORAMASPORT.AL
