Neymar mohoi informacionet e raportuara në programin Jijantes, sipas të cilave ai i ishte ofruar Barcelonës, por se mundësia e rikthimit te katalanasit ishte përjashtuar nga trajneri Hansi Flick.
“Përveç se është gënjeshtër, ky lajm është një mungesë e jashtëzakonshme respekti për sportistin dhe klubin e tij, Al-Hilal . Neymar Jr ka një kontratë me klubin saudit, është i lumtur në Riad dhe së shpejti do të kthehet në fushë për të kënaqur tifozët e tij në mbarë botën”, thuhet në publikimin nga agjenti i sulmuesit.
Reprezentuesi brazilian, i cili është pjesë e skuadrës së Jorge Jesus, është në fazën përfundimtare të rikuperimit nga operacioni që iu nënshtrua, pas një këputjeje të ligamentit të kryqëzuar të përparmë dhe meniskut në gjurin e majtë të pësuar gjatë shërbimit të kombëtares, më 17 tetor, 2023.
/GazetaBlic Sport/
