Xhek Grilish falënderoi trajnerin në largim të Anglisë Li Karslej, duke përfituar nga rasti për të lëshuar edhe një “shigjetë” në drejtim të ish-trajnerit, Garet Sauthgejt. Sulmuesi i Mançester Sitit tha se trajneri provizor riktheu kënaqësinë e të luajturit për kombëtaren, pasi u la jashtë skuadrës së “Euro 2024” nga ish-trajneri Sauthgejt.
Pas Europianit të Gjermanisë, Sauthgejt u largua nga stoli i kombëtares, ndërsa Karslej i drejtoi “Tre Luanët” në tre grumbullimet e ardhshme, duke i rikthyer në krye të grupit të tyre të Ligës së Kombeve pasi fitoi pesë nga gjashtë ndeshjet e tij në krye. Ai u përshëndet me kombëtaren e parë me një fitore 5-0 ndaj Irlandës, duke ia dorëzuar skuadrën trajnerit të ri Tomas Tuhel në nivele të larta. Tuhel do të nisë zyrtarisht detyrën e tij në fillim të vitit të ardhshëm ndërsa Karslej do të kthehet në rolin e tij të mëparshëm në krye të U-21.
“Çfarë personi dhe menaxheri! Legjendë absolute dhe faleminderit që rikthyet kënaqësinë me fanellën e Anglisë”, shkroi Grilish në “Instagram”. Komenti i sulmuesit vjen pasi ai ishte një mungesë shokuese nga skuadra prej 26 lojtarësh e Sauthgejtit, e cila fluturoi në “Euro 2024”, ku Anglia që humbi në finale kundër Spanjës. Por Grilish u rikthye në kombëtare nga Karslej në shtator dhe e shpërbleu menjëherë besimin duke shënuar në fitore 2-0 ndaj Irlandës në Dublin. Një muaj më vonë, ish-ylli i Aston Vilës tha se ishte i bindur se lënia e tij jashtë turneut të verës ishte një gabim.
PANORAMASPORT.AL
