Duket se gjithçka po i ndodh Manchester United-it. Përveç rezultateve zhgënjyese në fushë, klubi anglez po përballet edhe me pushtim minjsh.
Problemi nuk është i ri, por së fundmi janë gjetur jashtëqitje të këtyre kafshëve në disa suita të ‘Old Trafford-it’, si dhe në një kioskë që shet ushqime për tifozët, gjatë një vizite të fundit nga inspektorët e higjienës.
Për këtë arsye, klubi ka humbur dy yje në vlerësimin e higjienës ushqimore, duke kaluar nga katër në dy yje, dhe është urdhëruar që të bëjë rregullimet e nevojshme.
Sipas “Daily Mail”, përgjegjësit e “Djajve të Kuq” po punojnë tashmë me një agjenci për kontrollin e dëmtuesve dhe do të implementojnë një sërë masash për të zgjidhur problemin.
Problemi lidhet me vendndodhjen e stadiumit të United-it midis një kanali dhe një linje hekurudhore. Temperaturat më të ulëta gjatë dimrit e përkeqësojnë situatën, pasi këto kafshë tërhiqen drejt zonave më të ngrohta dhe të mbrojtura.
