Sjellja e Rafael Leaos dhe Teo Hernandez gjatë ndeshjes mes Lacios dhe Milanit ka qenë tema kryesore e diskutimit gjatë këtyre ditëve. Dy yjet e Milanit nuk ia bashkuan pjesës tjetër të skuadrës gjatë pauzës për rifreskim të lojtarëve në ndeshjen e fundjavës, duke sjellë reagime të shumta nga tifozët e jo vetëm.
Një prej atyre që i ka kritikuar menjëherë hapur ishte ish-sulmuesi italian, Paolo Di Kanio, i cili tashmë është në rolin e opinionistit të “Sky”. “Këtu po flasim për gjëra serioze, sipas meje ky është një turp i madh”, tha ish-lojtari.
“Këtu nuk je të skuadra e kalçetos pas pune, ku shkon, paguan fushën dhe mund të bësh çfarë të duash. Këtu je të Milani. Po flasim për Teon dhe Leaon, njëri bën shpesh edhe kapitenin. Çfarë po bëni!?”, ishte kritika e Di Kanios pasi pamjet bënë xhiron e rrjetit.
Video është shpërndarë sot mes tifozëve dhe ka marrë përgjigje në rrjetet sociale nga vetë Rafael Leao. Ky i fundit ka kujtuar të kaluarën e turbullt të ish-futbollistit, një lacial i deklaruar, por edhe me bindje të njëjta me tifozët ekstremistë të klubit bardhekaltër. Një nga skenat më të bujshme të Di Kanios ishte pikërisht përshëndetja fashiste që ai u bëri tifozëve të Lacios.
Dhe pikërisht kjo pamje është ajo që Leao ka publikuar në rrjetet sociale pa koment, duke i dhënë mundësinë ndjekësve të tij ta interpretojnë vetë si të duan.
— Rafael Leão (@RafaeLeao7) September 2, 2024
PANORAMASPORT.AL
