Është mbyllur në barazim 0-0 sfida mes Shqipërisë dhe Çekisë në “Air Albania” në raundin e pestë të Grupit 1 në Ligën B të Nations League. Një ndeshje e kujdesshme për të dyja skuadrat, por që në pjesën e parë pa skuadrën çeke të ndalet nga traversa në dy momente.
Në pjesën e dytë formacioni kuqezi u tregua më kërkues, iu afrua golit, sidomos me Laçin, por në të gjitha rastet konkretizimi i aksioneve nuk ishte i duhuri. Gjithçka u mbyll me rrjeta të paprekura, duke lënë gjithçka të hapur në këtë grup, me kuqezinjtë në kuotën e 7 pikëve, aq sa Gjeorgjia, ndërsa Çekia ndodhet në kuotën e 8 pikëve. Ukraina është me 5 pikë.
Është mbyllur në barazim 0-0 sfida mes Shqipërisë dhe Çekisë në “Air Albania”.
83’ – Një goditje dënimi e fituar nga Muçi është ekzekutuar nga Kristjan Asllani, i cili në dy tentativa nuk ka mundur të gjejë kuadratin.
67’ – Soucek ka një mundësi të artë, por gabon në momentin e fundit përballë Strakoshës.
52’ – Në zhvillimin e një goditje këndi është Tuci që tenton me të majtën, por pa problem për portierin e çekëve.
48’ – Edhe njëherë çekët të rrezikshëm në këtë fillim të pjesës së dytë, por Strakosha tregohet i saktë me ndërhyrjen e tij.
…nis pjesa e dytë
Mbyllet pjesa e parë…
45’ – Një aksion i bukur i kuqezinjve, Laçi provon me kokë në një pozicion të vështirë, por Kovar, portieri i Çekisë, është pozicional.
42’ – Laçi provon me një goditje nga distanca, por pa arritur të gjejë kuadratin.
36’ – Më në fund kuqezinjtë krijojnë një aksion të rrjedhshëm, por finalizimi i Bajramit është i gabuar.
30’ – Zëvendësim i detyruar në radhët e kuqezinjve: Asani del i dëmtuar, në vend të tij është Seferi.
17’ – Bajrami bën gjithçka bukur në zonën e çekëve, por në momentin e fundit gabon.
13’ – Një tjetër traversë për çekët(goditi Cerv), skuadra kuqezi është në vështirësi.
12’ – Goditja e parë nga këndi është për skuadrën çeke, traversa na shpëton nga pësimi i golit.
3’ – Asani tregohet i zgjuar duke rrëmbyer një top te lojtarët çek, por në momentin e fundit është ndalur nga mbrojtja
1’ – Çekët shkelmojnë të parët topin.
Ka nisur në “Air Albania” sfida mes Shqipërisë dhe Çekisë, e vlefshme për Nations League(Liga B, Grupi 1).
SHQIPËRIA: Strakosha, Balliu, Ismajli, Ajeti, Mitaj, Ramadani, Asllani, Laçi, Bajrami, Asani, Tuci. Trajner: Silvinjo
ÇEKIA: Kovar, Kufal, Holesh, Jemelka, Boril, Çerv, Suçek, Çerni, Shulc, Provod, Hori. Trajner: Ivan Hashek
