Trajneri i Vllaznisë, Tomas Brdariç, ka folur për mediat në prag të sfidës kundër Partizanit, që do të zhvillohet nesër në orën 19:00 në “Arenën e Demave” dhe do të transmetohet në RTSH Sport.
Pavarësisht mungesave të shumta, tekniku i kuqebluve thekson se skuadra e tij është gati dhe synon maksimumin e pikëve përballë Partizanit.
“E dimë që është një ndeshje speciale, është një nga ndeshjet më kryesore dhe duhet të jemi të vëmendshëm në mbrojtje. Jam shumë i sigurt që ndaj Partizanit do të krijojmë shumë mundësi dhe shpresoj të jemi sa më efektiv para portës së tyre. Ne do futemi për ta fituar ndeshjen.
Do të jemi sa më kompetitivë nesër, edhe pse me gjysmë forcash, por përsëri jam shumë krenar për futbollistët që kam. Jemi të fokusuar 100% në ndeshjen ndaj Partizanit që të fitojmë, edhe pse me një numër të madh futbollistë që mungojnë”, ka thënë mes të tjerash Brdariç.
