Paulo Dibala mund t’i japë lamtumirën Romës që në janar pasi është mësuar se menaxheri i tij po interesohet për një kalim në kampionatin turk të futbollistit argjentinas. Mediat turke dhe pastaj ato italiane kanë konfirmuar për një takim të menaxherit të lojtarit me drejtuesit e Gallatasarajit.
Klubi turk kërkon që të vazhdojë dominimin në vendlindje, por edhe të afirmohet në arenën ndërkombëtare, ndaj sheh Dibalan si emrin e duhur që mund ta ndihmojë në këto objektiva. Me sa duket, as Roma nuk është kundër, duke parë rendimentin që ka dhënë Dibala së fundmi dhe faktin që duket sikur po qëndron pa dëshirë te verdhekuqtë.
Edhe trajneri i Romës, Klaudio Ranieri, ka pranuar se Dibala mund të largohet, teksa i ka “hapur derën” argjentinasit. “Nuk di të them për këtë, secili bën lojën dhe punën e vet. Unë kam kënaqësi ta kem dhe ta hedh në fushë kur është mirë, por nëse ai ka prioritetet të tjera, duhet që të dy palët të jenë dakord. Nëse nuk do të qëndrojë dhe ekziston një mundësi… Unë dua vetëm lojtarë të cilët të jenë të lumtur që po qëndrojnë këtu”, tha Ranieri para mediave sot.
PANORAMASPORT.AL
