Vit i ri, një City i ri? Pikërisht për këtë po punohet në qytetin sportiv pranë stadiumit Etihad. Pas mbylljes së një serie prej pesë ndeshjesh pa fitore me një triumf ndaj Leicester City-t në ndeshjen e fundit të vitit 2024, Guardiola shpreson të fillojë vitin 2025 me këmbën e mbarë. Të shtunën, ekipi i tij pret West Ham-in, ku Lopetegui është nën presion dhe Bowen, lojtari më i mirë i “hammers” javët e fundit, është i dëmtuar.
Trajneri i City-t foli për vetëbesimin që fitoi ekipi i tij në stadiumin “King Power”, ndikimin e Savinho-s dhe McAtee, si dhe për rinovimin e mundshëm të kontratës së De Bruyne dhe procesin e rikuperimit të Rodri-t.
A ndihmoi fitorja ndaj Leicester për të përmirësuar moralin e ekipit tuaj?
Ishte një ndeshje ku nuk ishim në nivelin tonë më të mirë. Megjithatë, fituam. Ka ndeshje futbolli që shkojnë kështu. Të marrësh rezultate të mira është mirë për moralin. Jemi ende larg të qenit të qëndrueshëm në fitore, por tani kemi një mundësi tjetër kundër West Ham-it.
Çfarë mendoni për situatën e West Ham-it?
Kam shumë respekt për të; e njoh mjaft mirë. Gjithashtu, dimë cilësinë e lojtarëve të tij, megjithëse për momentin jemi të fokusuar vetëm te vetja jonë.
Cila është gjendja e lojtarëve të dëmtuar? Keni rikuperuar ndonjë prej tyre?
Do të kemi një ekip të ngjashëm me atë që luajti kundër Leicester-it. Dias po përmirësohet, por ende nuk është gati. Ederson u stërvit dje; ishte seanca e tij e parë pa shqetësime në këmbë. Shpresoj që të kthehet shpejt.
Si ndikoi te Savinho goli i tij i parë me City-n?
Mendoj se kjo do ta ndihmojë shumë. Ai ka pasur mundësi për të shënuar, por nuk ia ka dalë më parë. Jam i sigurt që tani do të na dhurojë momente të mira. Është shumë i ri, është sezoni i tij i parë në Angli. Mendoj se ka bërë mirë kur ka luajtur, por ka ende shumë për të përmirësuar.
A mendoni ta aktivizoni McAtee pas ndikimit të tij në fitoren ndaj Leicester-it?
Po, na ka bërë të mendojmë që ndoshta duhet të luajë më shumë minuta, por është i ri dhe kemi ende shumë ndeshje për të luajtur. Ai bëri shumë mirë dhe shokët e tij të skuadrës u gëzuan shumë për të. Të gjithë e respektojnë shumë për sjelljen e tij në dhomat e zhveshjes.
A mendoni se Rodri mund të rikthehet për të luajtur para fundit të sezonit?
Do të ishte mirë që të luante para fundit të sezonit, por qëllimi ynë është që ai të rikuperohet siç duhet dhe të jetë gati për sezonin e ardhshëm.
Ka ndonjë lajm për rinovimin e De Bruyne?
Nuk është puna ime…
A po vonohet rinovimi për shkak të shqetësimeve fizike të De Bruyne muajt e fundit?
Gjithmonë duam që ai të jetë në formën më të mirë fizike. Ka pasur probleme vitin e fundit. Diçka që po ndodh me shumë lojtarë këtë sezon. Nëse është i qëndrueshëm dhe në formë, mund të luajë rregullisht. E kam thënë shumë herë, ai është një lojtar shumë i rëndësishëm për ne. Vendimtar. Klubi do të marrë vendimin e duhur, duke marrë parasysh lojën e tij deri në fund të sezonit, moshën dhe shumë faktorë të tjerë. Mendoj se klubi duhet ta shqyrtojë me kujdes…
A do të bëni ndonjë blerje këtë muaj?
Nuk e di. Nuk është e lehtë, nuk do të jetë e lehtë. Ndoshta do të blejmë dikë… ose ndoshta jo. Mendoj se klubi duhet të jetë i zgjuar, të mos blejë thjesht për të shtuar lojtarë. Është e qartë që, për shkak të situatës që po kalojmë dhe dëmtimeve të shumta që kemi pasur, klubi duhet të bëjë diçka. Por nuk e di nëse do të jetë e mundur…
