Te Laçi ka përplasje mes drejtuesve dhe stafit të skuadrës. Situata në kampin kurbinas është mjaft e rënduar për shkak të rezultateve negative të siguruara në javët e fundit. Për këtë prej ditësh nuk është zhvilluar asnjë stërvitje për duelin me Dinamon.
Klubi ka mbajtur ditën e djeshme një mbledhje, ku nuk kanë munguar edhe debatet me tone të ashpra mes palëve. Ndërkohë sipas një njoftimi që ka bërë skuadra kurbinase, ditën e sotme do të ketë një tjetër takim mes drejtuesve dhe stafit, ku do të ketë pezullime dhe ndëshkime.
Që prej ndeshjes së fundit, ekipi i Laçit nuk po stërvitet.
Situata në ekip është mjaft e rënduar, si asnjëherë më parë.
Ditën e djeshme është zhvilluar një takim mes drejtuesve dhe stafit ku debatet nuk kanë munguar dhe është vendosur që sot në orën 18:00 të mbahet një tjetër takim me ekipin në ambientet e stadiumit “Laçi” nga ku priten pezullime dhe ndëshkime të rënda. Takimi do mbahet me dyer të mbyllura”, shkruhet në postim.
Kujtojmë se sfida me Dinamon do të luhet ditën e shtunë në orën 15:30 në Laç. Duel ky i vlefshëm për javën e 35-të të kampionatit dhe që është e parafundit e Superiores. Aktualisht kurbinasit mbajnë vendin e fundit në klasifikim me vetëm 33 pikë, 3 më pak se Bylisi dhe Tirana.
