Kombëtarja e Shqipërisë pret të dielën në stadiumin “Air Albania” në Tiranë, Poloninë.
Një sfidë që mund të rezultojë vendimtare për Shqipërinë në këtë fushatë eliminatore për Euro 2024.
Në konferencën për shtyp para ndeshjes, trajneri i polakëve Fernando Santos u shpreh se e vlerëson shumë Shqipërinë dhe se e njeh mirë forcën e saj edhe nga përballjet në të kaluarën.
“As unë dhe as trajneri i Shqipërisë nuk hyjmë për barazim, secila skuadër do të luajë për të fituar. Shqipëria është një kundërshtar me shumë cilësi, do të luftojmë. Është një skuadër që zhvillohet vazhdimisht, kam qenë në krye të një skuadre që është ndeshur me Shqipërinë në 2016 dhe jam i vetëdjishëm për forcën e tyre”, tha Santos para gazetarëve.
“Në futboll dikush fiton, dikush humbet. Në rast se fitojmë do të shikojmë ndeshjet e radhës dhe do ta kemi vetë në dorë fatin tonë, në të kundërt do të varemi nga të tjerët”, deklaroi ndër të tjera, Fernando Santos.
