Mbrojtësi i Malishevës, Qëndrim Pira është zgjedhur futbollisti më i mirë i xhiros së pestë në Superligën e Kosovës në futboll.
FFK-ja, ka njoftuar të martën se Pira është nderuar me çmimin “Ylli i Javës”, I cili ndahet pas përfundimit të secilës xhiro për lojtarin më paraqitjen më të mirë.
Komisioni i Veteranëve të futbollit, e ka vlerësuar Pirën si më të mirin, i cili ishte ndër më të merituarit për fitoren e Malishevës 3:1 në udhëtim te Dukagjini i Klinës.
Pira ishte lojtari më i rëndësishëm te Malisheva, ku krahas mbrojtjes së mirë, ai kontribuoi me gol dhe asistim në këtë fitore të rëndësishme.
Pas pranimit të çmimit, Pira është shprehur tejet i lumtur që është vlerësuar si më i miri I javës.
Ai ka thënë se është ndjerë mirë që ka arritur ta ndihmoj ekipin e tij të marrë një tjetër fitore të rëndësishme këtë sezon.
Po ashtu, ka zbuluar se edhe këtë sezon, synimi i Malishevës është të përfundoj në pjesën e epërme të tabelës.
Aktualisht, Malisheva ka tubuar 10 pikë në katër ndeshje të zhvilluara dhe së bashku me Ballkanin e Suharekën, janë ekipet e vetme që ende nuk dinë për humbje këtë sezon.
