Futbollisti francez Paul Pogba është një lojtar i lirë që kur ndërpreu kontratën me Juventusin me pëlqim të ndërsjellë dhe mund të nënshkruajë për një klub tjetër.
Ai tani synon të gjejë një ekip me të cilin të stërvitet në mënyrë që të kthehet në formë sa më shpejt të jetë e mundur përpara se të nënshkruajë një kontratë të re.
Pezullimi për doping i Pogba skadon në mars të 2025, pas së cilës ai do të jetë në gjendje të luajë përsëri.
31-vjeçari francez ishte i lidhur me Marseillen, si dhe me disa klube nga Liga Premier dhe MLS, por tani ka informacione se ai mund të shkojë në Turqi.
Mediumi turk Sabah shkruan se Pogba ka kontaktuar me drejtuesit e Galatasarayt përmes agjentëve të tij, në mënyrë që ata të informojnë klubin se ai është i interesuar të stërvitet me ta derisa të rikthehet në aksion.
Galatasaray është në krye të tabelës dhe nëse Pogba do të realizonte planin e tij, ai do t’i bashkohej yjeve të tjerë si Dries Mertens dhe Victor Osimhen.
