José Mourinho, trajner i Fenerbahçes, ndodhet në qendër të një polemike në Turqi pas fitores ndaj Konyasporit (3-2) në javën e 19-të të Superligës turke. Trajneri portugez është rikthyer te kritikat ndaj kampionatit dhe ka parë një këngëtar të famshëm turk të kërkojë dorëheqjen e tij.
“Ka qenë një ndeshje e ndershme dhe është për të ardhur keq që në Superligën turke nuk ka gjithmonë ndeshje të ndershme. Sepse historia e disa ndeshjeve shkruhet paraprakisht. Skuadra ime nuk është perfekte, por nëse të gjitha ndeshjet do të luheshin normalisht, si sot, ne do të ishim në një pozicion tjetër,” deklaroi Mourinho, duke theksuar se kjo situatë “përcakton fatin e kampionatit”.
Fettah Can, këngëtar i njohur turk dhe tifoz i Fenerbahçes, nuk e fshehu pakënaqësinë e tij ndaj Mourinhos.
“Kush e dënoi Fenerbahçen me këtë futboll të mjerueshëm duhet të japë dorëheqjen menjëherë. Është një turp, një marrëzi. Jemi absolutisht të shkatërruar,” shkroi ai në llogarinë e tij në X, por më vonë e fshiu mesazhin.
“Fshiva atë që shkrova, miq, po japim një shembull të keq për fëmijët tanë, nuk ka nevojë. Mourinho, bëj gati valixhet dhe ik!!!” shtoi më vonë.
Yazdığımı sildim arkadaşlar çoluğa çocuğa kötü örnek oluyoruz gerek yok. Mourinho valizini topla ve git!!!
— Fettah Can (@fettahcan) January 14, 2025
