Real Madridi nuk arriti të shënojë për të dytën ndeshje radhazi, duke u ndalur në një barazim pa gola ndaj Rayo Vallecano-s, që zgjat serinë e pamposhtshmërisë së vendasve kundër “Los Blancos” në Vallecas në katër takime rresht.
Pas dështimit për të gjetur rrugën e rrjetës ndaj Liverpool-it në mesjavë, skuadra e Xabi Alonso-s iu afrua golit që në minutat e para, por portieri Augusto Batalla ndali goditjen e fortë të Arda Güler. Real shtoi presionin me kalimin e minutave, por Vinícius Júnior dhe Bellingham u përplasën me pritjet vendimtare të Batalla-s. Në anën tjetër, Rayo u tregua e rrezikshme në kundërsulme, me Asencion që rrezikoi me kokë pranë shtyllës.
Pjesa e dytë nisi me më shumë vetëbesim për vendasit, që iu afruan avantazhit me De Frutos. Reali reagoi me raste të Güler, Bellingham dhe Mbappé, por mungesa e saktësisë dhe forma fantastike e portierit Batalla i lanë pa gol. Në minutat e fundit, Batalla ndali edhe një goditje me kokë të Éder Militão, duke siguruar një pikë të merituar për skuadrën e tij.
Ky ishte barazimi i parë i Real Madridit në një ndeshje zyrtare që nga qershori, si dhe hera e parë që “Los Blancos” mbeten dy ndeshje rresht pa fitore që prej prillit. Për Rayo Vallecano-n, ky rezultat forcon formën e mirë të ekipit, me vetëm një humbje në nëntë ndeshjet e fundit në të gjitha kompeticionet.
Në këtë ndeshje, mbrojtësi i Kombëtares shqiptare, Ivan Balliu, qëndroi gjatë gjithë kohës në stolin e Rayos.
