Superliga e basketbollit do të vazhdojë me dy super-ndeshje të “play-off”it.
Në këtë mesjavë do të zhvillohen gjysmëfinalet e dyta të garave shtesë në elitën e basketbollit të Kosovës.
Në kryeqytet sonte do të përballen Sigal Prishtina dhe Trepça, dy skuadra me traditë në basketbollin e Kosovës, që gjithmonë kanë dhuruar spektakël kur janë përballur.
Takimi i parë në Mitrovicë përfundoi me rezultat 80:65 për “Xehetarët”.
Prishtinasit e synojnë fitoren dhe më pas edhe kalimin në finale, e më pas ta fitojnë titullin pas pesë vjetësh pritjeje, kurse mitrovicasit ta mbrojnë titullin e kampionit.
Në Pejë po ashtu pritet përballje e zjarrtë ndërmjet Pejës dhe Bashkimit nesër mbrëma. Ndeshja e parë në Prizren përfundoi 81:61 për prizrenasit.
Verdhezinjtë hyjnë për fitore për ta barazuar serinë gjysmëfinale në 1:1, ndërsa Portokallezinjtë për të fituar dhe për ta bërë një hap drejt finales.
Në gjysmëfinale u kualifikuan direkt Bashkimi dhe Trepça, ndërsa Sigal Prishtina në çerekfinale e eliminoi Vëllaznimin, ndërsa Peja e eliminoi Golden Eagle Yllin pas tri ndeshjeve.
Kujtojmë se skuadra që i shënon tri fitore kalon në finale, derisa për t’u shpallur kampion nevojiten katër fitore.
