Presidenti i Paris Saint-Germain, Nasser Al-Khelaifi, shprehu gëzimin e tij pas fitores ndaj Bayern Munichut në gjysmëfinalet e Ligës së Kampionëve, me rezultatin e përgjithshëm 6-5, duke siguruar një vend në finale për të dytin sezon radhazi.
PSG do të ndeshet me Arsenalin në finalen e madhe për trofeun më të rëndësishëm në Evropë. “Është madhështore. Dy finale radhazi, tani duam të shkojmë atje dhe të marrim atë yllin e dytë. Fola me lojtarët dhe u thashë se nuk kemi vetëm lojtarë, kemi edhe luftëtarë,” deklaroi Al-Khelaifi.
Ai shtoi se suksesi i ekipit është rezultat i bashkëpunimit dhe përkushtimit: “Sot, të gjithë luajtën për ekipin dhe ishin të fortë. Kemi respekt të madh për Bayernin, një ekip i shkëlqyer me lojtarë të shkëlqyer. Sot bëmë historinë e PSG-së përsëri.”
Presidenti theksoi edhe përkushtimin e lojtarëve: “Ëndrra jonë është të fitojmë titullin e dytë të Ligës së Kampionëve. Ekipi është ylli, të gjithë luftojnë. Ky është futbolli, ky është Paris Saint-Germain. Kjo është ADN-ja jonë.”
Ai përfundoi me një mesazh për tifozët: “Ne kemi trajnerin më të mirë në botë, drejtorin sportiv më të mirë dhe tifozët më të mirë. Është për ta. Ata gjithmonë besojnë tek ne. Është madhështore.”
