Festa e tifozëve të Liverpoolit u kthye në tragjedi të hënën mbrëma, kur një makinë u fut në turmën e njerëzve në qendër të qytetit, duke lënë të lënduar gati 50 persona, përfshirë katër fëmijë.
Incidenti ndodhi në rrugën Water Street, pranë ndërtesës së njohur Royal Liver, menjëherë pasi rrugët ishin rihapur pas paradës së fitores në Premier League. Një 53-vjeçar britanik, i bardhë, është arrestuar në vendin e ngjarjes dhe autoritetet kanë konfirmuar se incidenti nuk po trajtohet si akt terrorist.
Pamje të publikuara në rrjetet sociale tregojnë momentin kur automjeti godet turmën dhe më pas vazhdon përpara me shpejtësi, duke i shtypur të pranishmit. Në një tjetër video shfaqen policët duke rrethuar makinën dhe mbrojtur drejtuesin nga turma e zemëruar.
Sipas shërbimit të urgjencës North West, 27 persona u dërguan në spital, ndërsa dy prej tyre, përfshirë një fëmijë, janë në gjendje të rëndë. Edhe 20 persona të tjerë janë trajtuar në vendngjarje.
Dëshmitarët përshkruajnë skena të tmerrshme. “Nuk kam parë kurrë diçka të tillë. Një person u hodh në ajër gjashtë metra larg,” tha Les Winsper, 55 vjeç. Ndërsa miku i tij, Craig Steward, shtoi: “Ishte kaos – njerëz që qanin, fëmijë të traumatizuar. Është gjëja më e frikshme që kam përjetuar.”
Kryeministri britanik Keir Starmer e cilësoi incidentin si “të tmerrshëm”, ndërsa klubi Liverpool FC ka shprehur solidaritetin me të prekurit.
Autoritetet kanë konfirmuar se nuk po kërkojnë persona të tjerë në lidhje me rastin. Hetimet vazhdojnë.
