Një 20-vjeçar është arrestuar në flagrancë në Tiranë, pasi u kap duke qarkulluar me automjet i armatosur me pistoletë dhe municion luftarak. Në pranga ka rënë i riu me inicialet S. D., banues në kryeqytet, ndërsa dy familjarë të tij janë proceduar penalisht pasi kundërshtuan punonjësit e Policisë gjatë kontrollit të banesës.
Sipas njoftimit të Policisë, ndalimi i automjetit u bë në rrugën “Kastriotët”, nga specialistët për Hetimin e Krimeve të Komisariatit Nr. 3, bazuar në informacionet e siguruara në rrugë operative.
Gjatë kontrollit të makinës, efektivët gjetën një armë zjarri pistoletë dhe municion luftarak, të cilat u sekuestruan në cilësinë e provës materiale. Pas këtij konstatimi, 20-vjeçari u arrestua në flagrancë.
Në vijim të hetimeve, Policia ushtroi kontroll edhe në banesën e të riut. Gjatë këtij veprimi, dy familjarë të tij, A. D., 51 vjeç, dhe L. D., 23 vjeç, dyshohet se kundërshtuan punonjësit e Policisë me qëllim pengimin e kontrollit. Për këtë arsye, ata u proceduan penalisht në gjendje të lirë.
Materialet procedurale iu referuan Prokurorisë për veprime të mëtejshme.
