Situata nuk duket mirë për Erik ten Hag. Barazimi pa gola ndaj Aston Villa e dënon Manchester Unitedin në vendin e 14-të në Premier League me vetëm 8 pikë në 7 ndeshje, shifra tmerruese që do të meren në konsideratë nga pronarët kur bëhet fjalë për të ardhmen e trajnerit holandez. Megjithatë, Ten Hag dukej shumë i qetë në një deklaratë të dhënë për Daily Mail.
“Klubi? Ne flasim gjatë gjithë kohës, çdo javë. Jemi të gjithë në bord, së bashku, në të njëjtën faqe. Po punojmë për një projekt afatgjatë. Kemi treguar në dy ndeshje shumë të vështira jashtë fushe se ky është një ekip. Ju mund ta shihni shpirtin”, ka theksuar Ten Hag pas dy barazimeve të arritura ndaj Portos në Europa League dhe ndaj Villains në ligë sot.
