Në “Ibrox Stadium” të Glasgout, Rangers sfidojnë Romën në takimin e vlefshëm për javën e katërt në grup të Ligës së Europës ’25-’26. Kjo ndeshje, e cila vjen për publikun shqiptar nëpërmjet Rrjetit të Radio Televizonit Shqiptar, do të jetë mjaft e rëndësishëm për të dy skuadrat, të cilat janë në kërkim të pikëve për të përmirësuar renditjen.
Vendasit e Rangers në tre ndeshjet e para nuk kanë mundur që të marrin asnjë pikë duke koleksionuar vetëm humbje. Për të ndryshuar këtë tendencë sot në fushë mendohet se Danny Rohl do të vendosë një formacion pa Nedim Bajramin. Për shqiptarin nuk ka një vend titullari edhe pse ekipit i mungojnë për shkak dëmtimesh lojtarë si Rabbi Matondo dhe Kieran Dowell. Mungesë me rëndësi është edhe ajo e mbrojtësit të krahut, Dujon Sterling.
Edhe në kampin e skuadrës italiane ka disa mungesa ku Gian Piero Gasperini do të duhet të bëjë në këtë transfertë pa u mbështetur në shërbimet e lojtarëve si Evan Ferguson, Paulo Dybala dhe Angelino.
