Edhe pse e fituan ndeshjen e fundit të kampionatit kundër Prishtinës, kjo nuk i mjaftoi Trepçës ‘89 për të shmangur rënien në Ligën e Parë për shkak të triumfit të Ferizajt ndaj Dukagjinit në minutat shtesë.
Goli i fitores i Ferizajt ngjalli shumë polemika për shkal të reagimit amatoresk të portierit mysafir, gol që ia siguroi Ferizajt barazhon për mbetje në elitën e futbollit vendor.
Pas ndeshjes, përmes një komunikate zyrtare, Trepça ‘89 ka reaguar ashpër duke akuzuar Federatën e Futbollit të Kosovës për ndikim të drejtpërdrejtë në rezultat.
Në reagimin e tyre, mitrovicasit bëjnë të ditur se kanë mbajtur një mbledhje urgjente ku kanë shqyrtuar atë që ndodhi në xhiron e fundit të Superligës së Kosovës.
Ky është postimi i plotë i Trepçës ‘89 (pa ndërhyrje):
Deklaratë për media.
Pas mbarimit të ndeshjes së sotshme Kryesia e KF Trepça ’89 FC mbajti takim urgjent dhe del me këtë deklaratë.
Së pari urojmë FFK-në për Skandalin e sotshëm ku pa kurrfarë marre dirigjon ndeshjen dhe ndikon direkt në rezultat.
U panë sot dashakëqijtë e Futbollit se si e bastarduan futbollin, se si mbrojti FFK-ja klubet servile të saj, ato klube që e përkrahën gjatë Kuvendit të fundit zgjedhorë.
Nuk është fundi i Botës që bie Trepça’89 nga Superliga por duhet ta dinë se nuk luhet me ndjenjat e një Klubi ndër më të organizuarat në Futbollin Kosovar tash e më shumë se tridhjetë vite.
Kjo çka ndodhi në Ferizaj është fytyra e vërtetë e kësaj Federate.
Kështu është uzurpu ky institucion.
Marre i koftë Komitetit Ekzekutiv, si e ndjejnë vetën ata sot. Si kanë fytyrë të ballafaqohen me Familjar të tyre, Shoqërisë, por për ata fjala marre nuk ekziston sepse ata marren e hajnë me bukë.
Përmes kësaj deklarate Ju kërkojmë falje Sportdashësve Mitrovicas por Jemi klub me traditë dhe do të kthehemi edhe më të fortë.
Përveç skuadrës mitrovicase, në Ligën e Parë ka rënë edhe Drenica.
