Klubi i Basketbollit, Trepça , ka shprehur shqetësim për incidentet që ndodhën gjatë finales së Superkupës me Pejën, në Therandë.
Trepça ka dënuar sjelljet e disa individëve të caktuar që po i bëjnë dëm klubit dhe basketbollit në përgjithësi, teksa premton masa të rrepta, njofton Klankosova.tv.
“Klubi i basketbollit Trepça angazhohet maksimalisht për sjellje të dinjitetshme të të gjithë akterëve në ndeshjet e basketbollit, duke përfshirë shikuesit në tribuna. Në të njëjtën kohë klubi ynë dënon sjelljen e disa individëve të caktuar, që mundohen të kamuflohen brenda grupeve të tifozëve, që i bëjnë dëm klubit tonë, imazhit të klubit dhe basketbollit në përgjithësi”, thuhet në reagim.
“Jemi të përkushtuar që të luftojmë dukuritë negative dhe nga ndeshja e ardhshme do të ketë masa të rrepta ndaj atyre individëve që me veprimet e tyre bien ndesh me misionin e klubit dhe basketbollit Kosovar””.
Përndryshe, Trepça gjatë mbrëmjes së dielës triumfoi në finale të Superkupës së Kosovës.
