Liga e Kampionëve do të vazhdojë sonte me katër ndeshje të tjera të fazës së “play-off”-it.
Pa dyshim, dueli kryesor i natës, por edhe i kësaj faze në përgjithësi do të jetë ai mes Real Madridit dhe Manchester Cityt.
“Los Blancos” e fituan duelin e parë në Angli me rezultat 3:2 javën e kaluar, shkruan “Gazeta Express”.
E tash, kampionët spanjollë, evropianë e botërorë do ta kërkojnë konfirmimin para publikut të tyre në “Santiago Bernabeu”.
Trajneri Carlo Ancelotti i ka motivuar lojtarët e tij, duke kërkuar nga ta që të luajnë si në “Etihad Stadium”.
Por, ka kërkuar nga ta që të jenë të kujdesshëm pasi kampionëve të Anglisë nuk iu dihet kurrë.
Përkundër formës së zbehtë të shfaqur në këtë sezon, trupa e Pep Guardiolës mund të shfaqet gjithmonë e rrezikshme.
Erling Haaland me shokë do ta kërkojnë sonte përmbysjen e madhe dhe njëherësh kualifikimin në të tetën e finales së Championsit.
Një tjetër sfidë interesante sonte do të jetë ajo mes PSV Eindhovenit me Juventusin.
“Zonja e Vjetër” e fitoi përballjen e parë në Itali javën e kaluar, ndërsa drejt Holandës është nisur për ta ruajtur këtë avantazh.
Kurse, PSV-ja para publikut të zjarrtë e kërkon sonte përmbysjen e madhe.
Favorit absolut për të shkuar tutje është edhe Paris Saint-Germaini, i cili e mundi Brestin në lojën e parë me rezultat 3:0.
Dhe, kampionët sonte duan ta kryejnë formalitetin dhe të ecin tutje në këtë garë.
Nga ana tjetër, vetëm ndonjë mrekulli e madhe mund t’ia shmangte Brestit eliminimin.
Edhe Borussia Dortmundi e sheh veten me një këmbë në të tetën e finales pasi kishte fituar javën e kaluar ndaj Sportingut në Lisbonë me rezultat 3:0.
Gjermanët sonte do të tentojnë ta ruajnë këtë kapital të madh për të përfunduar në mesin e 16 më të mirëve në Ligën e Kampionëve.
Tri prej katër ndeshjeve të sontme do të nisin prej orës 21:00.
