Në sezonin e kaluar, për herë të parë si kundërshtar, Romelu Lukaku u prit nga vërshëllima të jashtëzakonshme që në momentin kur autobusi i Romës ishte duke u futur në stadium.
U largua nga Interi për herë të dytë. Nëse e para ishte e justifikuar prej ofertës 100 milionë euro nga Çelsi, e dyta nuk iu fal nga tifozët zikaltër. Ishin të “armatosur” me bilbila dhe me aplikacionet e telefonave, ashtu si në kohën e Ronaldo Fenomenit që u transferua te Milani.
Lukaku nuk ia doli dot që të linte gjurmë në atë sfidë. Madje bëri një ndeshje fantazmë që e vulosi ai që ishte pasardhësi i tij, Markus Turam. Ishte ndeshje për t’u harruar edhe ajo e “Olimpicos” pavarësisht se përfundoi 2-4 për zikaltrit. Interi pësoi gol, pastaj e përmbysi. Turam ishte sërish vendimtar dhe Zomer e turpëroi në duelin një kundër një.
Këtë herë Lukaku uron që të shkojë ndryshe, madje e uron edhe Antonio Konte që kërkon të shfrytëzojë faktin që ka qenë pushim në mesjavë. Çfarë do të ndodhë?
PANORAMASPORT.AL
