Sezoni 2023-2024 është në prag të mbylljes teksa ka mbetur edhe një ndeshje për t’u luajtur.
Finalja e Champions League mes Real Madrid dhe Borussia Dortmund.
Madrilenët do të tentojnë titullin e dytë pas kampionatit ndërsa të udhëhequr nga Jude Bellingham kërkojnë të prekin për herë të 15 trofeun e Champions League.
Britaniku ka nisur që tanimë të konsiderohet edhe si lojtari favorit për të fituar Topin e Artë.
Megjithatë, për legjendën braziliane Rivaldo ky trofe prestigjioz mund të mos shkojë për fantazistin, por për shokun e tij të skuadrës, Vinicius Junior.
“Për atë se çfarë jep aktualisht, Vinicius është padyshim një nga lojtarët kryesorë të Real Madrid.
Ka shansin që të shndërrohet në lojtarin më të mirë të botës dhe të fitojë Topin e Artë.
Mendoj se ai tashmë është një nga tre më të mirët në qarkullim. Me atë se çfarë ka bërë këtë sezon, e shoh si një pretendent për të mposhtur Mbappe në garën për Topin e Artë.
Edhe pse një tjetër kandidat i fortë është Jude Bellingham.
Është një lojtar i jashtëzakonshëm dhe besoj se kjo finale e Champions League mund të përcaktojë shumë edhe mbi fituesin e Topit të Artë”, u shpreh Rivaldo.
Ceremonia e Topit të Artë për sezonin 2023-2024, do të mbahet në Paris më datë 28 tetor.
