Roma ka bërë një goditje të rëndësishme në merkato, në tentativën për të përforcuar radhët me një lojtar që shpresoj ta ndihmojë të shkurtojë diferencën me skuadrat ndaj të cilave rivalizon për një vend në Ligën e Kampioneve.
Klubi kryeqytetas ka gjetur më në fund akordin me klubin e Zhironës në Spanjë, për të sjellë në Itali golashënuesin më të mirë të La Liga në edicionin e kaluar, ukrainasin Artem Dovbik. “Sky Sport” bën të ditur se bisedimet e sotme mes palëve në Katalonjë kanë sjellë fundin e lumtur për Romën, e cila siguroi një firmë të rëndësishme.
Futbollisti i cili mbylli sezonin e kaluar në majën e listës së golashënuesve të La Liga me 24 gola. pritet të firmosë që nesër një kontratë pesëvjeçare, nga e cila do të përfitojë 3,5 milionë euro në vit. Ndërkaq, Zhirona do të përfitojë 35 milionë euro nga transferimi i tij, ku një pjesë do të jetë fikse, ndërsa do të ketë edhe bonuse në bazë të paraqitjeve dhe objektivave të arritur.
PANORAMASPORT.AL
