Liga e Arabisë Saudite është ndalur deri më 15 shkurt për Kupën e Azisë dhe Kupën e Afrikës.
Më shumë se një muaj pa garë, kohë në të cilin futbollistët që nuk bëjnë pjesë në kombëtaret e këtyre dy kontinenteve duhet të vazhdojnë punën e përditshme fizike.
Mes tyre edhe Cristiano Ronaldo.
Portugezi, i cili do të mbushë 39 vjeç më 5 shkurt, ka shpërndarë një video në të cilën shihet duke u stërvitur me trajnerin e tij personal. Një imazh që bën të qartë gjendjen e lakmueshme të formës së futbollistit veteran, i cili vazhdon të kujdeset rreptësisht për fizikun dhe dietën e tij.
Shifrat e Cristiano Ronaldos në vitin 2023 janë mbresëlënëse. Portugezi ishte golashënuesi më i mirë i vitit të kaluar me 54 gola. Një shifër stratosferike që e arriti falë golave të shënuar me Al Nassr dhe kombëtaren portugeze.
“Jam i lumtur. Kam shënuar shumë gola. Dua të jem sërish golashënuesi më i mirë në botë edhe në vitin 2024”, – shpjegoi ai pasi shënoi golin e tij të 54-t në ndeshjen e fundit të vitit kundër Al Tawoon.
