Ka kaluar 8 vite në Premier Ligë dhe 4 pret tyre duke luajtur me fanellën e një klubi legjendar si Liverpuli. Por duket se Mamadu Sakho nuk do të kujtohet për këto arritje të tij më shumë se sa për mënyrën se si po bëhet gati t’i japë lamtumirën Montpelje në Francë.
Sipas “L’Equipe”, gjatë stërvitjes së të martës, Sakho është përfshirë në një zënkë me trajnerin e skuadrës së tij, Mishel Der Zakarian. Nuk ka qenë një zënkë dosido, pasi ai e ka kapur nga jaka dhe e ka përplasur në tokë trajnerin në një debat që kishte lindur për një faull gjatë seancës stërvitore.
Der Zakarian nuk kishte dhënë faullin në favor të futbollistit që ka luajtur 29 ndeshje me Francën dhe ky i fundit kishte lënë fushën stërvitore në shenjë proteste. Trajneri i kishte thënë se stërvitja nuk ishte me zgjedhje dhe kjo kishte sjellë reagimin e francezit i cili e kishte përplasur me tokë, teksa ishte dashur ndërhyrja e personave të tjerë të pranishëm për të shmangur telashe edhe më të mëdha. De Zakarian raportohet se ka lënë stërviten i inatosur, duke përplasur dyert teksa kërkon që tashmë futbollisti të përjashtohet nga klubi.
PANORAMASPORT.AL
