Në prag të ndeshjes derbi ndaj Inter, mesfushori francez Adrien Rabiot ka folur për ndikimin që ai ka patur te kuqezinjtë: “Ndikimi i menjëhershëm te Milan? E prisja, prandaj erdha këtu. Nuk jam një lojtar egoist, por dikush që punon për grupin: Mendoj për mirëqenien e kolektivit, si në fushë ashtu edhe jashtë saj”.
“Personalisht, nuk besoj se një lojtar mund ta ndryshojë një ekip, por është e vërtetë që ai mund të japë një lloj kontributi të caktuar. Mendoj se me mua në fushë, ekipi është më i fokusuar, sepse unë i ndihmoj lojtarët me zërin tim, duke i mbajtur në gatishmëri. Kjo bën diferencën, sepse pastaj lojtarët thonë: ‘Në rregull, nëse ai e bën, duhet ta bëjmë edhe ne“, tha Adrien Rabiot.
“Kam zgjedhur të luaj futboll kështu: duke qëndruar shumë i përqendruar, duke lënë mënjanë të gjitha shpërqendrimet. Jam i lumtur që mund të them se jam një shembull: në fushë, e bëj veten të dëgjohet me zërin tim, mbërrij në stërvitje çdo mëngjes me qëllimin për t’u përmirësuar, për të bërë gjërat sa më mirë që të jetë e mundur, dhe më pas i kushtoj vëmendje trajtimeve, terapive, të ushqyerit dhe gjumit”, tha francezi.
Më tej, ai komentoi: “Këto janë të gjitha aspekte që janë pjesë e këtij profesioni: të stërvitesh mirë dhe të pushosh mirë. Nëse nuk pushon, nëse del jashtë, nuk do të kesh bërë gjithçka të mundshme. Ndihem se kam aftësinë të qëndroj në krye të gjërave, dëshirën për të ecur gjithmonë përpara dhe për të bërë më mirë“.
“Nëse jemi këtu, do të thotë që jemi të fortë, që kemi cilësi dhe këto janë gjëra që duhet t’i provojmë. Kjo është arsyeja pse është e dobishme të provosh, ndonjëherë të rrezikosh gjëra, dhe për ta bërë këtë duhet të kesh besim në vetvete“, tha Rabiot, i cili më pas foli për Luka Modric.
“Ne e dinim cilësinë e tij, por u mahnita nga fakti që ai mund të vrapojë për nëntëdhjetë minuta, para dhe mbrapa. Në moshën dyzet vjeç, kjo nuk është diçka që mund ta marrësh si të mirëqenë; ai ka një fizik të jashtëzakonshëm“, pranoi ai.
Është e pashmangshme të flasësh për marrëdhënien e tij me Allegri, fillimisht te Juventus dhe tani te Milan. “Trajneri ka mbetur gjithmonë i njëjtë, ndoshta tani është më i relaksuar. Me të, ekziston ambicia për të bërë mirë, për të dhënë gjithçka, për t’u stërvitur 100% dhe për të luajtur çdo ndeshje sikur të ishte e fundit“, tha ai.
