Leroi Sanesë nuk i kanë munguar fjalët e ëmbla ndaj “homologut” në fazën ofensive, Herri Kejn.
Anësori gjerman kontribuoi në dopietën e “bishës” angleze me dy asiste. Duket se partneritetet mes tyre e kanë kthyer në një “makineri goli” klubin më të titulluar në Gjermani, 42 gola pas 11 javësh në Bundesligë, asnjë ekip në 5 kampionate kryesore të Europës nuk ka arritur në shifra te tilla.
Sane e ka përkufizuar bashkëpunimin me Herrin si argëtues: “Kejn është shumë i zgjuar para portës mike, por jo vetëm. Aftësi mbresëlënëse në finalizim, krijimin e korridoreve për shokët e ekipit, mbrojtës tepër i mirë i topit dhe djalosh në sjellje. Takimi i fundit u kombinuam thuajse në perfeksion. Gjithçka po shkon mirë dhe në grup mbizotëron fryma pozitive. Nder të luash me Herrin”, përfundoi Leroi Sane në kanalin zyrtar të Bajernit.
Deri në këtë pikë të sezonit Kejn dhe Sane kanë shërbyer asist-gol mes tyre në Bundesligë 7 raste, binomi më i mirë europian, teksa në të gjithë turnetë Leroi numëron 9 finalizime dhe 7 asiste.
PANORAMASPORT.AL
